Vol. 1 No. 1

SALBRUM NI KOKTUN

Vol. 1 No. 1, Taltung 1420 T.E, Rs. 2

Assamo twitor tai togrem (haste) o rail krukmung

Watwi bangma phaimabai asaamni kwbangma hapingo railni thangphai duku mankha. Oboni nokbar chini haste o bo shiphaikha tamoni hinkai april talni 20-o rail lamani kuluk thangmabai 20 tai 21 aprilni lumding-agartala rail thangphai mwthap jakkha.

Oborokni bagwi rail bai thangnai borokrokno bo belaikhe takto manna nangkha.

Khasoima manmano TMC

Joto phaising kaham khlai thangkhai Tripura Medical College kwtalkhe swrwngnai roknno nahrnai o MCI ni khaisoma mannai. Phiya o bo rokno tuiwi kok chapmwng wnglainai may talni salsni o (may 7). O sal o MCI ni achukmwng bo ungnai. Achukmwng ungnai Tripura Medical College tai Dr. B R Ambedkar Hospital naikolnai bosongni bo.

tani hinkai MCI ni raida twino bini joto samung khlai tongwo-o-chengyaphang.

Haste ni Lukulekhamung chengsajakha haste-tangokra ni nukhung ni simi

Chini haste o bo lukulekhamung tai lukubangmungni mungtisalai (registration) chengsajakha haste-tangokra ni nukhung bai. E-2011 bisi-o bharat-ha-kotor ni joto haste o no lukulekhalaimung ungnai tai joto haste ni bororokno tong-sinimung-blaih (residential identity card) rijaknai.

THWNGMUNG

IPL-Indian Premier League 2010

3^rd IPL T20 cup ni final 25^th april o Mumbai Indians bai Chennai Super Kings rok Dr. D.Y.Patil Stadium ( Mumbai ) o thwnglaikha. Aro o Chennai Super Kings rok Mumbai Indians rokno mechemwi champion ongkha. Chennai Super Kings rok puila batting khlaiwi 168/5 khlaikha. Mumbai Indians rok 169 khlaikhe Chennai Super Kings no paikhamu, haiphano Mumbai Indians rok tai 22 runs khlai manliya. Mumbai Indians rok 146/9, 20 overs o khlaikha. Doug Bollinger Australia ni bowling kurungno Man of the match rwjak-kha, tai chini Sachin Tendulkar no Man of the Series rwjak-kha. Omo haino 1^st Chennai Super Kings 2^nd Mumbai Indians tai Royal Challengers Bangalore rok 3^rd ongkha IPL T20 2010 bisi o.

T20 World Cup 2010

3^rd ICC World T20 2010 April 30^th ni simi May 16 jora West Indies o ongnai. T20 World Cup puila 2007 bisiwo South Africa o tai 2009 bisiwo England o ongkha. Omo haikeno 2007 bisiwo India tai 2009 bisiwo khe Pakistan puila ongkha.

24^th North East Games 2010

24^th North east games 2010 meghalaya ni capital shillong o 19^th-24^th april o ongwi paikha. Aro o Manipur rok puila ongkha, assam rok 2^nd , 3^rd o khe meghalaya tai chini tripura rok khe 4^th ongkha.

Commonwealth Games 2010

XIX Commonwealth thwngmwng 2010 bisi o India ni capital new delhi o October 3 ni simi October 14 jora ongnai. A thwngmwng o 72 bodol rok manjaknai. O thwngmwng ni mascot ni bumung ongkha Shera.

KOMTHINGNAI NI KOK

Puila no jotono khulumo tai khakchangma yaphar o chini o koktun ni puila swikarimani bagwi.

Chini joto phai manjak phainai adongrok no o “Salbrum ni Koktun” no pori wi chini Borok Dopha no twi wi chwng teibo samung tangwi manna twi se wngthung hwnwi kha ka o.

Borok Hamkrai Bosong (BHB) hwnwi pharjak chini o bodol ni wngwi ang jotono o Koktun no chubama bai tisa hwnwi sakhlai o.

“Salbrum ni Koktun” o bisi o chwng hatibarsa o uaisa sapok karinai tai uklok ni bisi ni simi khe chwng obono salbrum ni koktma blaih khe tikhlai nai. Kokborok kok o tabuk bo chakukma kunu Koktma kwrwi kho hwnwi chwng o “Salbrum ni Koktun” no ulo o chini Kokborok kok bai Borok Dopha ni jotoni sai nangkukma tai porijaknai koktma wngthung.

Puila ni o karijakma o chwng political koktun, thwngmung, tai buini rohor jak kokrwbai rok no kari nai hwnwi chong kha.

Chwng chini koktma ni bagwi website khuluk:

http://salbrum.blogspot.com/

Email: salbrumnikoktun@gmail.com

Chini uansukma tai muchung ma khe je chwng chini dopha no kwtal uansukmung tai tongmung twiwi tisanani tai chini Dopha no hayung ni kaisa kotorkuk dopha hwnwi swnam nani.

PODRE POD

Koktang

Chumui

Chumui nahar wi naidi
phurmung bini bahai?
tula bwsate ahai da
siyari buthup hai da

birwi lai o chumui
nobar sib sib borwi
mwkhang bini le
phliksa no juda

hao tong twtwi nugwi
a birsajak chumui rokno
kha bising basang ani
motokma kwbang phaio

chumui hai angbo wngnai
chumui hai angbo birnai
langma ni sal hor o
angbo birsawi sibnai

- Bonnie Deb Barma

Agartala